ታዋቂው የኢንፎርሜሽን ቴክኖሎጂ ኩባንያ ማይክሮሶፍት ሁለተኛውን የሙከራ ማዕከል ኢትዮጵያ ውስጥ መክፈት እንደሚፈልግ ተገለፀ

ADVERTISMENT


ናይሮቢ የሚገኘውን በአፍሪካ የማይክሮሶፍት ብቸኛ የሙከራ ማእከል የሚያስተዳድረው የቴክኖብሬይን ኩባንያ እንደገለፀው ማእከሉ ወደ ኢትዮጵያ በመግባት በቴክኖሎጂ፣ በፐብሊክ ፋይናንስ አስተዳደር፣ በስልጠናና ማማከር፣ በታክስና ገቢዎች አስተዳደር፣ በቢዝነስ ስራዎች በስፋት መሰማራት ይፈልጋል።
.
ማይክሮሶፍት በዓለም ላይ ቻይና፣ ህንድ፣ ፖላንድ እና ኬንያ የሙከራ ማዕከሎች አሉት።
.
በኬንያ የኢ.ፌ.ዲ.ሪ ባለሙሉ ስልጣን አምባሳደር መለስ ዓለም ከድርጅቱ አመራሮች ጋር ትናንት (ግንቦት 15 ቀን 2011 ዓ.ም) ውይይት ባካሄዱበት ወቅት ኢትዮጵያ ውስጥ ስላሉ የኢንፎርሜሽን ቴክኖሎጂ መልካም እድሎችና በቀጣይ ድርጅቱ በሀገራችን ተሳትፎ በሚያደርግባቸው መስኮች ላይ ውይይት አድርገዋል።
.
የቴክኖብሬይን ዋና ስራ አስኪያጅ ማኖጅ ሻንከር ድርጅቱ በኢትዮጵያ ውስጥ የጀመረውን ኢንቨስትመንት ለማስፋት ከፍተኛ ፍላጎት እንዳለው ገልጸው እስካሁን መንግስት እያደረገላቸው ላለው ድጋፍ ምስጋና አቅርበዋል።
.
ቴክኖብሬይን ከኬንያ በተጨማሪ በዩጋንዳ፣ ታንዛኒያ፣ ማላዊ፣ ሩዋንዳ እና ዛምቢያ ቅርንጫፍ ከፍቶ በመስራት ላይ የሚገኝ ሲሆን ከዚህ ቀደም በታንዛኒያ፣ ጋና፣ ማላዊ፣ ዚምባብዌ እና ላይቤሪያ በሰራቸው የዘመናዊ መታወቂያ አሰጣጥና የታክስና ገቢ አሰባሰብ ስራዎች ይታወቃል።

ምንጭ:- በኬንያ የኢትዮዽያ ኤምባሲ